Pooriisi omuri Kampala erikukorera hamwe n’ebindi bitongore by’okwerinda yateebwa omu rurembo bwanyima y’abantu kutinisiriza kwesharinga eriizooba ebiro 08/01/2024.
Pooriisi neegira ngu tihaine muntu weena oikiriziibwe kutaho okwesharinga kwona.
Omugambirizi wa Pooriisi ya Kampala n’emyanya egiheriire, Patrick Onyango naagira ngu bacwamu kwongyera amaani omu by’okwerinda omuri za divijoni 5 z’omu rurembo kubaasa kurwanisa okwesharinga kwona okuteebekanisiibwe.
Naagira ngu Pooriisi etungire ekihandiiko eki yagira ngu kibaire kiteire aha mikura ya social media, abarwanirizi b’eby’obutegyeki abamwe barikurabura abantu ngu niheija kubaho obwesharingo omu rurembo n’ebicweka ebindi eby’eihanga.
Okurugiirira ahari Onyango, omuntu ohandiikire ebaruha nashaba abantu boona abakomirwe enshonga z’eby’obutegyeki kurekurwa. Ebaruha neyoreka ngu amaduuka naaza bizinesi zoona omuri eby’entambura omuri za taxi na boda-boda tibarikwija kukora kutandika n’eriizooba Orw’okubanza ebiro 08/01/2024.
Beitu hoona, arikugambaho n’abanyamakuru omu kasheeshe k’eriizooba, Onyango naagira ngu abanya-Uganda baine obugabe bw’okwesharinga baarabira omuri Pooriisi kandi bakatunga okwikirizibwa kuruga owa Mukuru wa Pooriisi ya Uganda.
Onyango yarabura eminyeeto okwerinda okwejumbira omu kwesharinga. Amakuru nigoreka ekigombe ky’eby’obutegyeki ekya National Unity Platform (NUP) nikyo kiri enyima y’okwesharinga.
Beitu, Omuhwezi w’omugambirizi wa NUP, Waiswa Mufumbiro yahakanisa ebirikugambwa ngu nibo bari enyima y’obwesharingo arikugira ngu zishemeriire kuba ziri enteekateeka za Pooriisi kwongyera kukwata abantu abanda n’okubataho omushango ahabw’enshonga ezitakamanyirwe
0 Comments