Pooriisi omuri Jinja ekwatsire omushaija ahabw’okutooroboza omuhara.

 

Paul Mwanje obwa hati akomiirwe aha Pooriisi ya Bugembe ahabw’okugambwa kuba atooroboize omuhara w’emyaka 14 emirundi mingi obwo bari omu Loogi.

Pooriisi omuri Jinja ekwatsire omushaija w’emyaka 35 bwanyima y’okumwiha aha batuura ababaire baine ekiniga kyingi barikwenda kumwita barikumutura okutooroboza omuhara.

Paul Mwanje obwa hati akomiirwe aha Pooriisi ya Bugembe ahabw’okugambwa kuba atooroboize omuhara w’emyaka 14 emirundi mingi obwo bari omu Loogi.

Mwanje, ishe w’abaana 3, n’omutuura wa Katende zone, omuri Bugembe Northern Divijoni omu rurembo orwa Jinja. Nagambwa kuba yagumire nabihabiha omuhara arikumutwara ‘out’ kuza kushemererwa kandi akaba namugurira za chips, enkoko, chapati naza switi.

Omu baana be 3, atwire nakunda munonga omwishiki ogu okukira ahandi baana be 2 (aboojo), Okurugiirira ahari rupoota ya Pooriisi ey’okucondooza.

Nyina w’omwana ogu akaza omuri United Arab Emirates aha ‘Kyeyo’ omu mwaka gwa 2023 kandi akasiga abaana 3 abu yasigiire ishebo.

Omukugambwaho n’omwishiki ogu, agizire ngu omurundi gw’okubanza, ishe akamugira ngu ataahe omuri kimwe aha kishengye amutegyererezemu.

Bwanyima y’akaire kakye, akaija yangira ngu njuure emyenda mbyame aha kitanda nikwo kumbyamaho. Bwanyima y’ekikorwa eki, akandabura ngu ntagira owunagambira kandi akandaganisa kumpeereza buri kimwe kyona ekindamushabe”.

Nakyoreka ngu ishe akaguhindura omuze yaguma nabyama nawe arikumuta omu kikorwa ky’omubonano okuhisya obungambiire omwe ahari banywani bangye abaizire bakagambiraho abaziire baabo bakamanyisa akakiiko k’ekyaro ekirugiriiremu okukwata kwa Taata.

Omugambirizi wa Pooriisi ahabw’ekyanga ekya Kiira, James Mubi naagira ngu omwishiki ogu bamutwire bamukyebera kandi ebirugire omu kukyebera nikworeka ngu ebicweka bye by’ekihama bikatunga obuzibu.

Okurugiriira aha batuura, Mwanje naagambwa kuba atwire nayetwara nk’orikurinda omuhara kandi abaire najuma buri mushaija weena orikugyezaho kwehisya haihi n’omuhara arikugira naija kukwata buri mushaija orikugyezaho kworeka ngu nakunda omuhara.

Mubi arabwire bakama baza hoteeri zoona, loogi n’endiijo myanya y’okushemererwamu obuteikiriza abaana abakiri abatakahikize myaka 18 kuza omu myanya yaabo.

Naagira ngu Mwanje naija kuteebwaho omushango gw’okutooroboza omuhara.